Լոռու մարզի դատախազությունում հարուցվել է քրեական գործ` նույն
մարզի Կաթնաջուրի համայնքային կենտրոնի հիմնանորոգման աշխատանքների
կատարման ընթացքում հայտնաբերված չարաշահումների դեպքի առթիվ:
Պետական շահերի պաշտպանության նկատառումներով նախապատրաստված
նյութերով պարզվել է, որ 2003-2009թթ. ընթացքում «Վահարեգ» ՍՊ ընկերության
տնօրեն Վ. Ասատրյանը, ով շահել էր Կաթնաջուրի համայնքային կենտրոնի
հիմնակառուցման աշխատանքների կատարման համար «Պետական գնումների
գործակալություն» ՊՈԱԿ- ի կողմից հայտարարված մրցույթը, պարտավորվել էր
պետական բյուջեի 101 960 300 դրամ նախահաշվային գումարով իրականացնել
Լոռու մարզի Կաթնաջուրի համայնքային կենտրոնի հիմնակառուցման
աշխատանքները: Սակայն աշխատանքների իրականացման ընթացքում ընկերության
տնօրենը կազմել է իրականում կատարված աշխատանքների ծավալները գերազանցող
ու փաստացի չկատարված աշխատանքների վերաբերյալ կեղծ կատարողական ակտեր եւ
ներկայացրել աշխատանքների նկատմամբ տեխնիկական հսկողություն իրականացնող
«Հանարդնախագիծ» ԲԲ ընկերության հաստատմանը: Վերջինիս տնօրեն Ք.
Կարապետյանի կողմից հաստատվելուց հետո Վ. Ասատրյանը դրանք ներկայացրել է
վճարման:
Աշխատանքների կատարման ընթացքի, ծավալների եւ որակի համար
պատասխանատու պաշտոնատար անձինք առանց ստուգելու աշխատանքների պատշաճ
կատարված լինելը հաստատել են հիշյալ կեղծ կատարողական ակտերը:
Արդյունքում Վ. Ասատրյանը նշված ամբողջ գումարից հափշտակել է 1 428 210
ՀՀ դրամ խոշոր չափի գումար:
Լոռու մարզի դատախազի որոշմամբ` դեպքի առթիվ հարուցվել է քրեական գործ` ՀՀ
քրեական օրենսգրքի 308-րդ հոդվածի 1-ին մասով եւ 179-րդ հոդվածի 2-րդ մասի
3-րդ կետով: Քրեական գործն ուղարկվել է ոստիկանության` Լոռու մարզի
քննչական բաժին` նախաքննություն կատարելու համար: