a1plus.am

Երևանի քաղաքապետ Կարեն Կարապետյանը և «Հարավկովկասյան երկաթուղի» ՓԲԸ գլխավոր տնօրեն Շևկետ Շայդուլլինը փետրվարի 24-ին համաձայնագիր են ստորագրել 2011-2015թթ. սոցիալ - տնտեսական համագործակցության մասին։

Ստորագրված համաձայնագրով նախատեսվում է քաղաքամերձ և քաղաքային երկաթուղային տրանսպորտի զարգացման համալիր ծրագրի մշակում, տրանսպորտային հանգույցի ստեղծում՝ երկաթուղային տրանսպորտի և մետրոյի, քաղաքային ուղևորատար ավտոտրանսպորտի արդյունավետությունը բարձրացնելու նպատակով:

Նախատեսվում է «Հարավկովկասյան երկաթուղի» ՓԲԸ բազայի հիման վրա կազմակերպել Երևանի մետրոպոլիտենի և քաղաքային էեկտրատրանսպորտի շարժակազմի վերականգնման և վերականգնողական աշխատանքները։

Բացի այդ, նախատեսվում է 25%-ից մինչև 50% զեղչեր սահմանել երկրի ներսում գնացքով երթևեկող ուսանողների համար:

Երևանի քաղաքապետարանի առաջարկությամբ «Հարավկովկասյան երկաթուղի» ՓԲԸ - ն տեխնիկա-տնտեսական հաշվարկներ կներկայացնի «Մանկական երկաթուղու» ընդլայնման ( նոր շինարարության) նախագծի վերաբերյալ։

Համագործակցության շրջանակում կողմերը կուսումնասիրեն «Ալմաստ» գործարանի շրջակայքում Երևան -Հրազդան - Երևան ուղղությամբ երթևեկող էլեկտրագնացքի համար ուղևորային կառամատույցի կահավորման հնարավորությունը։

Այս մասին հայտնում է Երևանի քաղաքապետարանի աշխատակազմի տեղեկատվության և ասարակայնության հետ կապերի վարչությունը: