Հաղորդում է Ա1+-ը
Վերահսկիչ պալատի նախագահ Իշխան Զաքարյանն այսօր արձագանքեց ՀՀԿ-ական պատգամավոր Սպարտակ Մելիքյանի ելույթին:
Երեկ ՎՊ տարեկան հաշվետվությունից հետո Սպարտակ Մելիքյանը Վերահսկիչ
պալատին մեղադրեց 4 հազար ԱՄՆ դոլար կաշառք պահանջելու մեջ, երբ ստուգվում
էր «Անանիա Շիրակացի» համալսարանը:
«Ես շատ լավ հասկանում եմ, որ որոշ մարդիկ ցանկանում են Վերահսկիչ
Պալատը մեղադրել կեղտոտ խաղերի մեջ. դա երևաց թե գործունեության սկզբնական
փուլում, երբ փորձ արվեց ուղղակի ջարդել ՎՊ-ի ողնաշարը, ինչը չհաջողվեց, և
թե նաև երեկվա ելույթներից մեկում, որը ցույց տվեց, որ կիրառվելու են
անթույլատրելի և հայկական բարոյականությանը խորթ երևույթներ»,-ԱԺ-ում
հայտարարեց ՎՊ նախագահ Իշխան Զաքարյանը:
Ըստ նրա` «Անանիա Շիրակացի» համալսարանի 100 տոկոս բաժնեմասի
սեփականատերը հենց պատգամավոր Սպարտակ Մելիքյանն է: Իսկ այդպիսի
գործունեությամբ պատգամավորը ՀՀ Սահմանադրության համաձայն չի կարող
զբաղվել: Իշխան Զաքարյանի խոսքերով` հարցը պետք է լուծել իրավական
հարթությունում. «Այսօր արդեն դիմել ենք դատարան, այնպես որ այս խնդրի հետ
կապված մնացած բոլոր հարցերը կքննարկվեն օրենքի դաշտում»:
Ի դեպ, լրագրողների հետ զրույցում Սպարտակ Մելիքյանն ասել է. «Ես
խնդրելու եմ խորհրդարանին, որ ինձ զրկեն անձեռնմխելիությունից, որ
հետագայում որևէ մեկը չասի, որ անկաշկանդ եմ կամ խոչընդոտ եմ առաջացնում
այդ քննությունը մինչև վերջ տանելու համար»:
Նա նաև ավելացրել է է, որ Վերահսկիչ պալատի վերաբերյալ կարծիքը իրենն է և կապ չունի ՀՀԿ-ի հետ;
|