ՄԱՄԼՈ ՀԱՂՈՐԴԱԳՐՈՒԹՅՈՒՆ 

  Հայաստանի քաղաքացիական հասարակության կազմակերպություններն իրենց բողոքի ձայնն են բարձրացրել ընդդեմ Արդարադատության նախարարության գաղտնի և ոչ մասնակցային աշխատաոճի, ինչի միջոցով նախարարությունը փորձում է տոտալ վերահսկողություն հաստատել հասարակական կառույցների վրա և խալխլել ժողովրդավարության հիմքերը Հայաստանում:

  Արդարադատության նախարարության հեղինակած, ՀՀ Կառավարության 5 օգոստոսի 2010 թվ-ի N 1042-Ն որոշումը հանդիսանում է քաղաքացիական հասարակության վրա պետական ճնշման գործիք և կոռուպցիոն ռիսկերի աղբյուր:

  Հայաստանյան հասարակական կազմակերպություններն իրենց բողոքի ձայնն են  բարձրացրել ընդդեմ այս որոշման, որով ՀՀ Կառավարությունը ի դեմս Արդարադատության փորձ է անում ստեղծել մի ամենազոր ստուգումների գործառույթներով օժտված մարմին, որի անորոշ լիազորությունների շրջանակը և ընթացակարգերը կարող են դառնալ պետական ճնշման և կոռուպցիոն ռիսկերի աղբյուր:

  Սույն որոշումը, որով ստեղծվող մարմնի նպատակը ստուգումների անցկացումն է և <անհրաժեշտության դեպքում> կազմակերպությունների փակումը, ուղղակի կախվածության մեջ է գցում ոչ առևտրային կազմակերպություններին Արդարադատության նախարարությունից:

  Հասարակական կառույցների համար անընդունելի են վերոհիշյալ որոշման մշակման, ներկայացման և Կառավարության նիստում հաստատման ոչ թափանցիկ ու անհասկանալի գործընթացները, ինչով ըստ էության, արհամարվել է ժողովրդավարության հիմնական հիմնասյուներից մեկը` քաղաքացիական հասարակության ինստիտուտը:

  Որոշմամբ հաստատված ամենազոր վերահսկողական կառույցն իր անորոշ լիազորությունների շրջանակով և ընթացակարգերով, գնահատում ենք որպես էական սպառնալիք Հայաստանի Հանրապետությունում քաղաքացիական հասարակության կայացմանը:

  ՀՀ Կառավարությունը հաստատելով Արդարադատության նախարարության կողմից ներկայացված վերը հիշատակված որոշումը, ղեկավարվել է Պետական կառավարչական հիմնարկների մասին ՀՀ օրենքի 9-րդ հոդ. 2-րդ և 3-րդ կետերի, 11-րդ հոդ. 1-ին կետի և ՀՀ նախագահի 18.07.2007թ. թիվ ՆՀ-174-Ն հրամանագրի պահանջներով, իսկ Արդարադատության նախարարությունը դրա ընդունման անհրաժեշտությունը հիմնավորել ՀՀ Կառավարության 08.10.2009թ. թիվ 1272-Ն որոշմամբ հաստատված <Հակակոռուպցիոն ռազմավարության իրականացման 2009-2012թթ. Միջոցառումների ծրագրի> հավելված 1-ի 65-րդ կետի պահանջով: Սակայն թվարկված իրավական ակտերը Արդարադատության նախարարությանը ոչ առևտրային կազմակերպությունների նկատմամբ ստուգումներ անցկացնելու և սանկցիաներ կիրառելու իրավունք չեն վերապահում:

  Հաշվի առնելով վերոնշյալը, պահանջում ենք ՀՀ Կառավարությունից`

1.    Վերանայել վիճահարույց փաստաթղթերը և ուժը կորցրած ճանաչել ՀՀ Արդարադատության նախարարության իրավաբանական անձանց գործունեության վերահսկողության տեսչության կանոնադրությունը և կառուցվածքը հաստատելու մասին ՀՀ Կառավարության որոշումը:

2.    Հանձնարարել Արդարադատության նախարարությանը բարելավել իր աշխատանքի թափանցիկությունը և մշակել նախարարությունում իրավական ակտերի մշակման գործընթացում հասարակության իրազեկման և ներգրավման հստակ ու թափանցիկ մեխանիզմներ:

  Քաղաքացիական հասարակության կառույցների նախաձեռնող խումբ:

  www.armenianngo.net