Հաղորդում է A1+-ը

Արդարադատության նախարար Գևորգ Դանիելյանը պաշտոնազրկվել է իր աշխատանքային պարտականությունները ոչ պատշաճ կատարելու պատճառով։
Այդ մասին այսօր Կառավարության նիստի ժամանակ ասել է վարչապետ Տիգրան Սարգսյանը:

«Մենք պետք է մեծ կարևորություն տանք բոլոր գերատեսչություններում էթիկայի կանոնների պահպանմանը և պաշտոնատար անձանց պահվածքին։ Հարկադիր կատարման ծառայության ղեկավարը թույլ է տվել էթիկայի կանոնների լուրջ խախտում։ Արդարադատության նախարարին հանձնարարվել է հրապարակային պատժել նրան իր պահվածքի համար։ Ցավոք, նախարարը այս հանձնարարականը չի կատարել, և կարծում եմ` դա անթույլատրելի է։ Կհամաձայնեք, որ պաշտոնատար անձանց պահվածքը, մանավանդ ենթակաների հետ, ունի էական նշանակություն»,-ասել է վարչապետը։

Ապա ավելացրել է. «Եթե մենք ուզում ենք, որ մեր երկիրն ունենա զարգացման այնպիսի ընթացք, որը ներառված է կառավարության ծրագրերի մեջ, մեզնից յուրաքանչյուրի պահվածքից շատ բան է կախված։ Մենք պետք է խստապահանջ լինենք մեր ենթակաների նկատմամբ` անթույլատրելի համարելով այնպիսի պահվածքը, որն ուղղակի խաթարում է հանրության վստահությունը մեր նկատմամբ։ Այսուհետ էլ այդ առումով լինելու ենք շատ խստապահանջ»։

Հետաքրքիր է, որ Արդարադատության նախարարության կայքում երեկվա ամսաթվով տեղադրված է հրաման, որով Գեւորգ Դանիելյանը խիստ նկատողություն է հայտարարում Հարկադիր կատարման ծառայության ղեկավար Միհրան Պողոսյանին: